Најдобриот светски тенисер Новак Ѓоковиќ со победа го започна УС Опен.
Новак во „Мисија 21“ тргна со победа над 18-годишниот Холгер Руне во 4 сета, 6:1, 6:7(5), 6:2, 6:1.
По завршувањето на мечот, во разговор со српските новинари, Новак ги откри неговите впечатоци од овој меч.
„Ситуацијата оваа година е мошне необична. Потребно ми е малку време да се разиграм, да го пронајдам ритамот на играта и темпото кое ја краси мојата кариера и на УС Опен. Знам дека морам да играм подобро и дека ќе се случи тоа, тргнав добро во првиот сет, имав и брејк во другиот за 4:3“, вели Новак и додава:
„И покрај тоа имав слаб процент, имав лоши грешки. Малку се успорив, а мојот противник имаше поддршка од публиката. Млад е, беше мотивиран и затоа го изгубив вториот сет. Но добро, одиме понатаму. Можеби е подобро да изгубам сет во првиот натпревар за да на некој начин играм подобро. Морав да направам пауза после Токио бидејќи навистина ми беше потребна за да се подготвам психички и физички за УС Опен“, вели Ѓоковиќ.
Неговиот противник во второто коло е Талон Грикспор кој е 121. играч во светот.
„Што се однесува до наредниот противник, не знам многу за него. Никогаш не сум играл против него но го гледав неговиот меч со Штруф за кој сметав дека ќе победи“, заклучи Новак.
На прашањето како го коментира тоа дека медиумите не му обраќаат премногу внимание, тој вели:
„Не знам што да кажам, дали моите успеси не се прифатени од страната на медиумите или останатите играчи. Благодарен сум што се занимавам со спортот што го сакам и сум успешен. Забележав многу историски резултати и знам кој сум и што постигнав и тоа не може да ми го одземе никој“, рече Новак.
„Го следам својот пат и ја градам својата животна приказна“, заклучи Ѓоковиќ.