Нови протечени фотографии кои се појавија на интернет покажуваат дека Apple ќе направи голем редизајн на iPhone смартфоните за оваа година. Но, овојпат редизајнот не доаѓа однадвор, туку однатре.
Фотографиите кои оригинално беа објавени на Slashleaks покажуваат нова матична плоча на iPhone моделите од најновата генерација.
Матичната плоча (основна логичка плоча) е главниот внатрешен елемент на телефонот и таа е одговорна за спојување и комуникација со различните електронски делови кои прават телефонот да работи.
Површно, не може да се забележи што точно ќе добиеме со новиот редизајн. Не знаеме како тоа ќе се одрази на надворешниот дизајн, ниту пак кои функции и карактеристики ќе ги има новиот iPhone со редизајнираната матична плоча. Но, според фотографиите изгледа дека Apple прави обид за да ослободи место за поголема батерија.
Досега неколку извори најавија дека новиот iPhone би требало да има батерија со 20% поголем капацитет од оној на постоечката генерација. Модифицираната батерија би требало да помогне со неколкуте нови, засега непознати, карактеристики кои ќе ги има овогодинешниот iPhone.