Различни физички лица поднеле нови кривични пријави против обвинители во Специјалното јавно обвинителство за кривично дело малтретирање во вршење на службата, потврдуваат од Основното јавно обвинителство.
Со претходните пријави досега се поднесени вкупно шест пријави против обвинители во новото обвинителство, една од кривичните пријави е против три познати лица, обвинители и неколку непознати лица, три од кривичните пријави се против неколку непознати лица и две од кривичните пријави се против двајца обвинители и неколку непознати лица.
Во Основното јавно обвинителство за гонење на организиран криминал и корупција е поднесена една кривична пријава против едно лице, вработено во Министерството за внатрешни работи, за строено кривично дело незаконито влијание врз сведоци.
„Поднесените кривични пријави се распределени за натамошно постапување кај надлежни обвинители“, соопштуваат од Јавното обвинителство.
Од Специјалното јавно обвинителство за Макфакс изјавија дека обвинителите постапувале согласно законските овластувања и најавуваат дополнителни информации на прес конференција.
Специјалната јавна обвинителка, Катица Јанева во понеделникот се повика на демантот од Обвинителството и не прецизираше дали навистина сведоците во Обвинителството се испрашувале без адвокат и нивните искази не биле снимани.
„Предистражаната постапка е тајна и сите сведоци кои се сослушани и кои ќе бидат сослушани ќе бидат предмет на оценка на судот кога ќе се отворат истражните постапки“, рече Јанева.
Тимот на Специјалната обвинителка во понеделник започна увид во предметот „Пуч“, во којшто е обвинет лидерот на СДСМ, Зоран Заев.
„Од судот на располагање ни е оставена просторија за вршење на увид. Како што напомнавме увидот се уште трае и во овој момент не сме во можност да Ви обезбедиме дополнителни информации“, информираат од Специјалното обвинителство.
