Бергамашите многу потешко од очекувањата ја совладаа Болоња, додека Милан успеа да слави на тешкото гостување кај Сасуоло.
Со голот на Луис Муриел во 63. минута тимот на Аталанта конечно го скрши отпорот на гостинот од Болоња, гол кој се покажа решавачки. Ова е првпат по јануари Аталанта да постигне само еден гол на домашен терен кога со 1:2 беше изненадена од СПАЛ. Всушност, тоа е и последниот пораз на „Нераѕурите“ од Бергамо.
Црна дамка на овој натпревар фрли караницата на трнерите Џан Пјеро Гасперини и Синиша Михајловиќ. Главниот судија Федерико Ла Пена прво им покажа жолт картон на двајцата, а откако Гасперини продолжи да негодува беше и исклучен.
Милан ја продолжи одличната форма и со двата гола на Златан Ибрахимовиќ триумфираше на гости кај Сасуоло, тим кој исто така беше во добра форма.
Ибра погоди во 19. минута, па во 42. Франческо Капуто израмни од белата точка, за Ибра потоа во судиското надополнување повторно да донесе водство. Ова е прв пораз за Сасуоло по 8 натпревари со што заврпи нивната добра серија.
