Нови пожари попладнево се разгоруваат на територијата на Општина Куманово.
Пожарот го пријавиле во Територијалната противпожарна единица во Куманово, од каде им било кажано дека во овој момент немаат слободно противпожарно возило бидејќи активни се 10 пожари.
Мештаните на селото Четирце, за Кумановски Муабети, велат дека сами го гаснат пожарот, но не можат да сторат многу бидејќи во селото нема струја и вода, а дува и силен ветер кој не им оди во прилог, известува kumanovskimuabeti.mk.
Пожар ги зафати и скопските села Ракотинци и Кучково, потврдија за МИА од Центарот за за управување со кризи.
За пожарите се известени припадниците на Територијалната противпожарна бригада на Град Скопје. Во моментов се преговара за исклучување на струјата со ЕВН со цел да не се предизвикаат дополнителни искри и ширење од пожарот.
Од ЦУК велат дека пожарот од Ракотинци се движи кон Сопиште.
На мејлот на МИА стигна и писмо потпишано од жители на селото Кучково, во кое наведуваат дека пожар го зафатил селото и упатуваат апел да се реши проблемот со водата.
-Почитувани медиуми вие сте нашиот спас, ПОМАГАЈТЕ! Општината не се јавува на нашите повици. Без капка вода сме, ако се прошири пожарот ќе изгориме! Во селото живееме само постари луѓе ако зафати тешко ќе може да се спаси нешто, се наведува во писмото.
