Останати спортови

Нови правила, нови решенија: Кастер Семенја го изгуби спорот со ИААФ

2. мај 2019 - 15:07 | К.З.

Контроверзната атлетичарка Кастер Семенја го изгуби спорот во случајот со Меѓународниот атлетски сојуз (ИААФ), кој со новите правила има дозвола да го ограничи нивото на тестостерон кај жените атлетичарки.

Арбитражниот спортски суд (ЦАС) ја одби жалбата на јужноафричката атлетичарка која се однесува на новите правила на ИААФ.

Според новите правила, Кастер Семенја ќе треба да зема посебни медицински лекарства кои ќе го намалат нивото на тестостерон во нејзиното тело, со цел да може да добие дозвола да се натпреварува покрај останатите атлетичарки во женска конкуренција. Таа и другите атлетичарки со пореметувања во сексуалниот развој (ДСД) ќе мора да земаат медикаменти доколку сакаат да учествуваат на кратките трки до 400 метри или во спротивно ќе мораат да ја променат дисциплината.

ЦАС ја одби жалбата на Семенја, но објави дека судот е навистина загрижен поради практичната примена на новите правила во иднина, како и за нивниот ефект над спортот.

„ИААФ веќе десет години се обидува да ме забави, но тоа само ме направи посилна. Одлуката на ЦАС нема да ме запре. Ќе поминам преку ова и ќе продолжам да бидам инспирација за младите жени и атлетичарки од Јужна Африка и целиот свет“, изјави 28-годишната Семенја.

Според ЦАС, новите правила за атлетичарките со ДСД се дискриминаторски, но потребни, разумни и пропорционални, за да се заштити угледот и интегритетот на натпреварувачките.

Коментирај