Компанијата LG Display разви екран за кој тврди дека е првиот што може да се растегнува за дополнителни 50%.
„Оригиналната“ големина на екранот е 12 инчи, но може да се растегнува до 18 инчи, како и да се искривува и витка. Претходниот модел беше претставен во 2022 година и можеше да се протега од 12 до 14 инчи.
Во производството на екранот LG користеше неколку нови технологии, меѓу кои е и подобрувањето на својствата на специјалниот силиконски супстрат кој се користи во производството на контактни леќи. Исто така, беше развиена нова структура за дизајн на жици, а LG ја подобри растегливоста и флексибилноста на панелот.
Технологијата за прикажување во слободна форма, како што ја нарекува LG, се карактеризира со целосна црвена, зелена и сина боја со резолуција од 100 ppi. Екранот користи и микро-LED извор на светлина помал од 40 микрометри, што му овозможува на екранот да се протега повеќе од 10.000 пати. Компанијата тврди дека дисплејот е сè уште со висок квалитет и покрај влијанието на надворешните фактори и поекстремните температури.
Сепак, растегливиот екран сѐ уште е само прототип, но кога ќе се појави на пазарот еден ден, неговата примена ќе биде доста голема.
