Pirelli го претстави „On The Road“, календарот за 2022 година во кој на фотографиите се наоѓаат некои од најголемите музички имиња како Иги Поп, Шер, Рита Ора, Грајмс и Џенифер Хадсон.
Ова издание на реномираниот календар го направи славниот канадски музичар Брајан Адамс и е посветено на најголемите таленти во светот на музиката, стои во соопштението.
„На пат бев во последните 45 години бидејќи животот на музичарите се состои од патувања, патишта, чекање во хотели и часови минати на сцената“, изјави Адамс.
Од 1964 година во календарот на Pirelli имаат учествувано вкупно 37 фотографи меѓу кои Ени Лебовиц и Марио Тестино, а преку него се претставени импресивни таленти како што се Кејт Мос, Наоми Кембел, Софија Лорен и Меги Чеунг.
За календарот во 2017 година Питер Линдберг сними различни холивудски актери меѓу кои се најдоа Ума Турман и Кејт Винслет, во серија соголени црно-бели портрети.
Верзијата за 2022 година е 48 издание по ред на италијанската компанија и истовремено нуди увид во животот на уметници кои патуваат. Секој месец Адамс претставува не само нова ѕвезда, туку и нова сцена.
