Новиот пар гуми никогаш не треба да се става на предната оска, а за тоа има многу добра причина.
Експертите за гуми тврдат дека милиони сопственици на возила прават голема грешка. Кога не се заменуваат сите, туку само истрошените предни гуми, никогаш не треба да се става новиот пар гуми на предната оска. Наместо тоа, треба да се монтираат на задната оска, а гумите што биле на задната оска треба да се преместат на предните тркала.
Можеби веќе го знаете ова правило, но техничкиот менаџер на Michelin во Обединетото Кралство, Брајан Портиус, неодамна за Auto Express изјави дека половина од британските возачи воопшто не знаеле дека тоа е неопходно при промена на само еден пар гуми, пренесува хрватскиот дневен весник Jutarnji list. Исто така, нагласи дека и многу продавници за гуми и вулканизери не го знаат ова правило.
Можеби сега се прашувате зошто е подобро да ставите понови гуми во задниот дел кога предниот е тој што ги прави сите свртувања и наглите сопирања? Сето тоа е поврзано со стабилноста. Поставувањето подобри гуми на задната оска го намалува ризикот од лизгање и вртење на автомобилот на влажни коловози.
„Кога возилото е стабилно, тогаш можете да почнете да размислувате за сопирање. А, она што всушност го гледате е дека има доволно сила на сопирање и влечење и покрај делумно истрошените предни гуми“, објасни Портиус.
Најважно е дека возачот со новите гуми позади ќе има полесно разбирање и контролирање на секое пролизгување на предниот дел. Мешавината од меки нови предни гуми и стари тврди задни гуми често завршуваат во неконтролирано занесување при големи брзини, додека во спротивно можноста за такво нешто е многу помала и возачот може многу полесно да ја спречи оваа појава.
Експертот на Michelin, исто така, вели дека правилото „нови гуми на задната оска“ се применува без оглед на конфигурацијата на погонот на вашиот автомобил, вклучително и возилата што се опремени со погон на задните или на сите тркала.
