Новиот селектор на фудбалската репрезентација на Португалија, Роберто Мартинес, го објави списокот со 26 фудбалери за натпреварите против Лихтенштајн и Луксембург на стартот од квалификациите за ЕУРО 2024, а меѓу повиканите се најде и фудбалерот на саудиски Ал Наср, Кристијано Роналдо.
„Се сретнав со сите 26 фудбалери кои беа во Катар. Важно е да разговараме, да ја видиме нивната посветеност. А, Роналдо е многу посветен фудбалер. Ова е моја одлука. Тој може да ни донесе искуство, а тоа е многу важна особина за тимот“, изјави Мартинес.
Роналдо (38) со 118 голови во португалскиот дрес е светски рекордер според постигнати погодоци на репрезентативен план, додека со 196 настапи за репрезентацијата во моментов го дели првото место на вечната листа во таа категорија со Кувајќанецот Бадер Ал-Мутауа.
„Годините не ме интересираат. Роналдо има победнички карактер и сакам тоа да им го пренесе на другите играчи. Што се однесува до статусот, има ист како и сите други во тимот“, рече Мартинес.
