Бразилското „чудо од дете“ Ендрик сега е новата мета на сите најголеми европски клубови.
Неверојатниот 15-годишен напаѓач на Палмеирас, кој постигна 172 гола на 175 натпревари во јуниорските категории, е голема желба на Барселона, која веќе понуди огромна сума за него, но сега во трката се вклучија и други клубови.
Барса веќе некое време го следи Ендрик, а пред неколку недели ги испрати своите најдобри скаути во Бразил. Тие го гледаа младиот напаѓач на Копиња, најголемиот турнир за играчи до 20 години во Бразил, каде Ендрик постигна пет гола на седум натпревари и доминираше против многу постари играчи.
Барса би платила 45 милиони евра на три рати
Кога се увериле во неговите способности, на клубот му порачале дека мора да биде доведен по секоја цена. Бразилските медиуми објавија дека Барселона понудила 45 милиони евра што би ги исплатила на три рати. Првата кога Ендрик ќе потпише професионален договор со Палмеирас, втората кога ќе ја одигра првата сениорска сезона и третата кога ќе дојде во Барселона на 18 години.
Но, проблемот е што сега за него „загризаа“ и други клубови и лесно е можно Ендрик да биде најскапиот тинејџер во историјата на фудбалот. Daily Mail пишува дека Манчестер Сити, Манчестер Јунајтед и Ливерпул се распрашуваат за него, а Шпанците пренесуваат дека Реал Мадрид, кој е познат по тоа што носи млади Бразилци од неговата татковина, наскоро ќе испрати свои луѓе во Бразил.
Сите сакаат да го договорат неговиот иден трансфер пред Палмеирас да вгради огромна клаузула во неговиот професионален договор, многу поголема од онаа што ја нуди Барселона. Семејството на играчот е информирано за интересот на најголемите европски клубови, но Ендрик наводно нема намера да го напушти Бразил како дете, туку сака да стане професионалец во Палмеирас и дури потоа да направи трансфер.
Воодушевува со головите
И додека европските клубови ги кршат главите за тоа како да го доведат, Ендрик продолжува да се истакнува во Копиња. Завчера во победата на Палмеирас од 5:2 постигна фантастичен гол со „ножички“ од 16 метри, а претходно на турнирот постигна неверојатен гол по една соло акција по која почнаа да го споредуваат со Роналдо. Ја зеде топката, помина двајца играчи и потоа мајсторски го „зезна“ голманот. Двата гола станаа вирални на социјалните мрежи.
