Студијата на Универзитетот во Цирих покажа дека земањето додатоци на омега-3 дневно може да го забави биолошкото стареење за дури 4 месеци.
Истражувањето опфатило 777 здрави постари возрасни лица, на возраст од 70 до 91 година, кои учествувале во најголемата европска студија за стареење, позната како „Do Health Study“, пишува SwissInfo.
Во период од 3 години, учесниците биле поделени во 8 групи, при што секоја група добивала различни терапии: омега-3, витамин Д, програма за вежбање и нивни комбинации.
Биолошката возраст на учесниците била мерена со помош на т.н. епигенетски часовници, кои ги следат хемиските промени во ДНК, за да се измери разликата помеѓу биолошкото и хронолошкото стареење.
Резултатите покажале дека учесниците кои земале омега-3 масни киселини старееле меѓу 2,9 и 3,8 месеци побавно во текот на тригодишниот период, без оглед на полот, возраста и индексот на телесна маса.
Дополнувањето на витамин Д и редовното вежбање го подобриле ефектот и го забавиле стареењето за речиси 4 месеци.
Сепак, истражувачите забележале дека не постои единствен стандард за мерење на биолошката старост, па затоа се потребни дополнителни истражувања.
