Се подготвува реално шоу во кое ќе се бараат вљубеници во вселената низ целиот свет, а победникот ќе освои патување до Меѓународната вселенска станица.
Продуцентската куќа Space Hero LLC со седиште во Велика Британија е во преговри со компанијата Axiom Space од Хјустон, Тексас која организира приватни летови во вселената за да го резервира местото за најсреќниот натпреварувач кој во 2023 година ќе влезе во приватна вселенска капсула и ќе ја посети МВС.
Засега не е даден временски рок за изведување на шоуто, ниту е избрана платформата на која би се емитувало реалното шоу наречено „Space Hero“.
„Шоуто ќе помогне некому да стане првиот обичен човек кој бесплатно летнал во вселената и ја посетил Меѓународната вселенска станица“, стои во соопштението на продуцентската куќа.
Екипата ќе го следи победничкиот кандидат низ напорните подготовки за десетдневниот престој во МВС.
МВС кружи на височина од 400 километри над Земјата и со неа заеднички управуваат главно американски и руски екипажи чии членови таму изведуват разни научни експерименти кои би било невозможно да се изведат на Земјата.
Ако се реализира, ова ќе биде најскапата награда на телевизиско реално шоу доделено досега.