Членовите на светски реномираниот бенд „Њу ордер“ (New Order), еден од најголемите бендови на сите времиња, беа „артисти во фокус“ на филмскиот фестивал за музички документарни филмови Скопје Синема Сити.
Бендот ја доби наградата за животно дело за достигнувања во музиката и филмот. Наградата им беше испратена во Манчестер.
По повод оваа награда, тие се пофалија на нивните официјални профили на Facebook и Twitter заблагодарувајќи се на фестивалот за укажаната чест.
A big thanks to Skopje Cinema City film festival, for awarding New Order with a Lifetime Award for Achievements in Music...
Posted by New Order on Sunday, September 20, 2020
„Оваа награда ја изразува нашата почит за музиката на бендот, која практично претставува саундтрак на нашите животи и е нераздвоен дел од современата култура. Нивните песни се совршен спој од срце и душа, исполнети со музички иновации и смело експериментирање. Како резултат на тоа, нивната музика обележала повеќе музички сцени што се појавиле почнувајќи од 80-тите до денес. Тоа ги прави да се достојни на нашата восхит и почест,“ вели директорот на фестивалот, Ненад Георгиевски.
Фестивалот беше отворен со филмот „Декади“ на режисерот Мајк Кристи во дворот на Кинотека на Македонија и на тој начин им беше одадена посвета на составот. За потсетување, Фестивалот ги има наградено со истата награда Дејвид Боуви (2015), Леонард Коен (2016), Руичи Сакамото (2018), Филип Глас (2019) и Влатко Стефановски (2019).
Наградата за бендот, а и сите визуелни решенија, се дело на Дијана Димитриевска која е долгогодишен соработник на фестивалот и важи за една од најинвентивните млади дизајнерки.
Синоќа со џез вечерта на Скопје Синема Сити и прикажувањето на филмовите „Го викав Морган“ и „Бил Фрисел“ се заокружи првиот викенд на Скопје Синема Сити и следниот е најавен за 2 и 3 октомври во Кинотека на Македонија.