Red Magic е новиот телефон на Nubia, бренд кој е во сопственост на компанијата ZTE. Она што го прави посебен во однос на останатите смартфони е тоа што Red Magic е направен за гејминг, а тој тоа го покажува и со неговиот изглед.
Nubia Red Magic е пред сѐ визуелно многу привлечен смартфон, а неговите октагонални облици на отворите за камера и сензор за отпечатоци, комбинирани со црвеното LED светло на задниот дел сигурно ќе ве натераат да размислите да го купите.
Спецификациите нема да ве воодушеват, иако се сосем солидни. Red Magic поседува голем, 6-инчен екран со дисплеј од 2160 х 1080 пиксели, но нема панел од 120 Hz како оној на смартфонот на Razer. Исто така, овој телефон го користи минатогодишниот модел на Qualcomm процесор, Snapdragon 835 наместо новиот Snapdragon 845.
Останатиот дел од телефонот е стандарден, како за Android телефон од високата класа. Тој доаѓа со 8 GB RAM и 128 GB внатрешна меморија, а има и поевтина верзија која поседува 6 GB RAM и 64 GB внатрешна меморија. Red Magic може да се пофали со прилично добар сет камери, од кои задната е 24 мегапиксели, а предната е 8 мегапиксели. Она што е импресивно кај овој телефон е големиот капацитет на батеријата од 3.800 mAh, но и GameBoost софтверот, за кој од Nubia тврдат дека би требало значително да го подобри гејминг искуството.
По минатогодишните Razer Phone и Xiaomi Black Shark, сега на пазарот за телефони пристигнува и Nubia Red Magic, па може да се каже дека гејминг индустријата го шири своето влијание и во светот на смартфоните.
Во Кина веќе од 25 април ќе почне продажбата на овие телефони, а нивната цена ќе биде 2.499 јени (397 американски долари) за послабата верзија и 2.999 јени (477) долари за посилната верзија.