Собранието на пленарна седница со 64 гласа „за“ и 11 „против“ ги донесе измените на Законот за урбанистичко планирање, во скратена постапка, предложени од министерот за транспорт Александар Николоски.
Од О2 Иницијативата гласно реагираа против продолжување на можноста деталните урбанистички планови да се прават по стариот закон, со застарени податоци и во нетранспарентна процедура. Побараа од претседателката Гордана Силјановска-Давкова да не го потпишува указот за прогласување на Законот и истиот да го врати на повторно разгледување во Собранието со задолжително спроведување на јавна расправа.
„Бараме, согласно вашите законски надлежности како Претседател на РСМ, да не го потпишувате указот за прогласување на Законот за изменување и дополнување на Законот за урбанистичко планирање, кој е донесен по скратена постапка на 13.08.2024 и да го вратите законот на повторно разгледување во Собранието со задолжително спроведување на јавна расправа на која ќе присуствува стручната јавност и граѓанските организации. Овој закон е донесен по скратена постапка, иако последиците од него се огромни и нè засегаат сите. Донесен е без јавна расправа, без консултации со стручната јавност, без објавување на Единствениот Национален Електронски Регистар на прописи на РСМ (ЕНЕР) со можност да се дадат коментари и да се влијае во процесот на негово донесување, без задолжително известување на сите засегнати здруженија на граѓани и невладини организации. Ваков суштински закон чии последици ги трпиме сите не смее да се донесе без јавна расправа и учество на стручната јавност и граѓанските организации“, се наведува во барањето на О2 Иницијатива.
