По 13 години во дресот на Габон одличниот напаѓач одлучи дека е време да се збогува од националниот тим.
Пјер-Емерик Обамејанг потврди дека е дојден крај на неговата авантура во репрезентацијата на Габон и дека отсега целосно ќе му се посвети на клупскиот фудбал и враќањето на Барселона на победнички патеки под водство на Чави Ернандес.
„После 13 години гордо претставувајќи ја мојата земја, соопштувам дека ја завршувам мојата репрезентативна кариера. Сакам да им се заблагодарам на габонскиот народ и сите оние кои ме поддржуваа во добро и во лошо. Ќе ми останат гомила одлични спомени, како денот кога дебитирав, или денот која од Нигерија се вратив со африканската Златна топка“, пишува Обамејанг во писмо со кое им се обрати на габонските навивачи.
Обамејанг играше за Габон од март 2009 година, но никогаш не успеа со оваа африканска земја да се избори за настап на Мундијал. Запиша 72 настапа на кои постигна 30 голови, а последниот му беше на 4 јануари годинава кога го постигна единствениот гол во победата од 1:0 на пријателска против Мавританија како дел од подготовките за Африканскиот куп на нации на кој Обамејанг не настапи откако закачи ковид.
„Сакам да им се заблагодарам на сите мои тренери, членови на стручниот пштаб и играчи со кои сум соработувал во кариерата. На крај, му се заблагодарувам на мојот татко кој ми ја всади желбата да бидам како него, се надевам дека го направив горд носејќи ги нашите бои“, додаде.
Роден во француски Лавал, Обамејанг можеше да игра за Франција, земјата каде е роден, потоа Шпанија бидејќи мајка му е Шпанка, а на крајот се одлучи за Габон, репрезентацијата која неговиот татко Пјер Обамејанг порано ја предводеше како капитен. Обамејанг подоцна го направи истото, стана капитен на Габон, а со репрезентцаијата настапи на 5 африкански првенства како и на Летните олимписки игри 2012 во Лондон.
Капитенот на „Пантерите“ во јуни ќе го прослави својот 33 роденден.