Свет

Обединетото Кралство одби на Маврициус да му врати острови во Индиски Океан

22. ноември 2019 - 15:53 | МИА / Ф.З.

Лондон, 22 ноември 2019 (МИА) – Обединетото Кралство на Велика Британија и Северна Ирска одби на Маврициус да му ја врати контролата врз неколкуте оддалечени острови во Индискиот Океан, а на кои се наоѓа и американска воена база.

Генералното собрание на ОН со 116 гласа „за“ и само шест „против“ во мај годинава одлучи Обединетото Кралство до 22 ноември на Маврициус да му го врати архипелагот Чагос, но тие тоа не го сторија, пренесе Sky News.

Во необврзувачкото гласање, 56 земји, вклучувајќи ги Франција и Германија, останаа воздржани.

Со оглед на тоа дека мина шестмесечниот рок, премиерот на Маврициус изјави дека Обединетото Кралство од сега е „илегален колонијален окупатор“.

Маврициус тврди дека во 1965 година бил присилен во замена за независноста да го предаде овој архипелаг, оддалечен 500 километри од Малдивите, на британските прекуморски територии.

Моментално на островите живеат околу 3.000 луѓе, главно Британци и Американци, а домородци има само околу 250. Но, бројката на домородците била и тоа како поголема сѐ до пред четириесетина години кога Обединетото Кралство насилно ги депортирало за да се направи простор за американска воена база.

Обединетото Кралство, меѓутоа, смета дека има право да ја задржи власта врз островите од кои еден, наречен Диего Гарсија, е седиште на американска воено-воздухопловна база.

Коментирај