Британската Влада денеска објави детали од новиот закон со кој на барателите на азил им се забранува влез во земјата со помош на мали чамци.
Според новиот закон, секој што ќе пристигне со мали чамци нема да може да бара азил и ќе биде депортиран во таканаречените безбедни трети земји, објави Sky News.
Мерката ја осудија хуманитарни организации кои им помагаат на бегалците, тврдејќи дека може да криминализира илјадници бегалци.
Премиерот Риши Сунак го нарече запирање на пристигнувањето на бродови како еден од петте клучни приоритети на неговата влада, откако бројот на мигранти што пристигнаа на јужниот брег на Англија минатата година се искачи на повеќе од 45.000, а околу 90% побараа азил.
– Тие нема да престанат да доаѓаат овде додека светот не дознае дека ако нелегално влезете во Британија, ќе бидете притворени и брзо вратени назад. Овој закон дозволува илегалците да бидат притворени без кауција или судска ревизија во првите 28 дена од притворот до нивното заминување, изјави британската министерка за внатрешни работи Суела Брејврман.
Добротворната организација Совет за бегалци соопшти дека десетици илјади вистински бегалци на кои претходно им бил одобрен азил ќе бидат „затворени како криминалци“, што ќе ги „урниса“ обврските на Обединетото Кралство согласно Конвенцијата на ОН за бегалци, додека Брејврман тврди дека законот е компатибилен со меѓународните обврски.
Поранешниот британски премиер Борис Џонсон минатата година договори испраќање на десетици илјади мигранти во Руанда, која е оддалечена повеќе од 6.400 километри од Обединетото Кралство, а Европскиот суд за човекови права ја блокираше депортацијата непосредно пред да полета првиот авион со бегалци.
