Првиот македонски долгометражен филм за деца „Стела“ на режисерот Стојан Вујичиќ и продуцентот Огнен Антов ќе има премиера на 23 март во Синеплекс во Скопје, а сега е објавен првиот официјален трејлер.
Снимањето на филмот се одвиваше на територијата на нашата држава во Скопје, потоа продолжило во живописниот Галичник (за првпат во земјава на еколошки сет), за да заврши во Штутгарт, Германија.
„Стела“ е приказна за едно куче – шарпланинка, едно дете и еден дедо. Звучи идилично, но не е. Откако детето Николa ќе проба да се самоубие заради континуриано малтретирање во училиштето, изгледа дека никој не ќе може да допре до него. Престанува со секаква вербална комуникација. Шарпланинката Стела е единствена која не бара ништо од него, не поставува прашања, не бара одговори. Доволно е неговото постоење и среќна е од неговата близина. Детето ќе почне да се поистоветува со неа, па неговиот глас може да се слушне единствено кога лае. Дедото, кој избегал од луѓето да живее сам на бачилото, неволно ќе го прифати Никола за во текот на оваа авантура да станат семејство бегајќи од своето вистинско семејство. Не знаејќи, со тоа ќе се доближат до она од што бегаат, но сега променети ќе можат да продолжат со животот или мирно да заминат од другата страна на вечноста“, објаснуваат од продукциската куќа „Дрим Фектори“.
Во филмот главните улоги ги толкуваат: младата шарпланинка Стела, 12-годишниот Петар Маниќ кому ова му е прва улога, Дејан Лилиќ, Тони Михајловски, Симеон Дамески и Христина Поповиќ. Сценариото е на Ева Камчевска, кинематографијата е на Ѓорѓи Клинчаров, костимограф на филмот е Милена Миленковиќ, а снимател на звукот е Срѓан Бајски.