Трејлерот за последната сезона на хит серијата „House of Cards“ не можеше да биде погенерички дури и ако две минути во кадар од блиску се вееше американско знаме, но Netflix мораа да бидат внимателни откако го избркаа Кевин Спејси.
Но, не дека може да го фрлиме првиот камен. Серијата уште е многу важна за Netflix – тоа е скап проект со високо талентирана актерска екипа.
Пред крајот на 2017 година Netflix го раскина договорот со Кевин Спејси поради обвинувањата за сексуално вознемирување кои беа упатени кон него. Иако тоа веројатно беше правилниот потег од морална гледна точка, сепак компанијата не можеше да ја спречи големата парична загуба поради одлуката. Според Deadline, одлуката на Netflix да ја откаже соработката со Кевин Спејси на два од нивните проекти ја чинеше компанијата 39 милиони долари.
Двата проекти за кои станува збор се биографскиот филм во кој Кевин Спејси требаше да ја има главната улога, „Gore“, и шестата и последна сезона од „House of Cards“. Извршниот директор на Netflix, Дејвид Велс, не сакаше да ја потврди оваа сума, но сите останати извори велат дека износот од 39 милиони одговара на трошоците кои ги имаше компанијата кон Кевин Спејси.
Netflix во февруари официјално соопшти дека серијата „House of Cards“ ќе биде продолжена за уште една сезона и покрај големиот скандал кој го доживеа главната ѕвезда Кевин Спејси, но таа ќе биде најкратка во историјата на телевизиското шоу.
Робин Рајт се враќа во главната улога во серијата „House of Cards“, но нејзиниот досегашен партнер Кевин Спејси нема да биде дел од последната сезона.
Креаторите на оваа серија ќе имаат само 8 епизоди во кои ќе треба да ја раскажат разврската на целата приказна околу семејството Андервуд. За разлика од минатите сезони кои имаа по 13 епизоди, последната ќе биде скратена скоро на половина. На сценаристите останува да размислат како ќе го изведат излегувањето на Кевин Спејси од серијата, откако тој претходно беше планиран како постојан член на екипата и во новата сезона.
Претходно беше објавено дека на актерската екипа се приклучуваат Грег Кинеар и Дајен Лејн, кои ќе им се придружат на веќе постојаните членови Робин Рајт, Мајкл Кели, Џејн Еткинсон, Патриша Кларксон и Констанс Зимер.