Кубанката Мавис Алварес тврди дека славниот фудбалер Диего Марадона ја запознал на 16-годишна возраст кога пристигнал на Куба за да се одвикне од дрога. Имал секс со неа, ја дрогирал и ја чувал затворена во хотелска соба.
Марадона се сретнал со Алварес во хотел во градот Варадеро, кога пристигнал на Куба за да се одвикне од дрога на покана на поранешниот лидер на Куба, Фидел Кастро.
„Тоа беше најголемата грешка во мојот живот. Бев само девојче. Тој беше богат странец и ми обрнуваше внимание. Не можев да кажам не“, вели Алварес.
Таа тврди дека била принудена да оди на операција за зголемување на градите, по што била однесена во Аргентина, без дозвола на нејзините родители. Кога се запознале во 2000 година, тој имал 40 години.
„Откако го запознав не смеев да излегувам сама. Секогаш имав придружба. По сите овие години се чувствувам понижено, имав само 16 години и бев дел од сето тоа“, открива Мавис Алварес.
Девојката тврди дека Марадона ја одвел во Аргентина и ја држел затворена во хотел цели три месеци и ја навлекол на дрога.
Новите докази против Марадона испливаа поради обвинение против негови поранешни познаници обвинети за трговија со луѓе. Алварес тврди дека Марадона и луѓе од неговиот круг со авион ја однеле во Аргентина каде 3 месеци била затворена во хотелска соба. Во оваа земја смеела да прави две работи, да оди на шопинг и во зоолошка градина, со постојана придружба.
Нивниот однос траел 3 години, а за сѐ молчела две децении бидејќи се плашела дека кубанската власт може да направи проблеми на нејзиното семејство.