Пејачот Принс почина на 21 април 2016 година. После двегодишна истрага, објавени се видео снимки направени пред и по смртта на славниот пејач.
На снимката од безбедносните камери, 24 часа пред смртта, се гледа како Принс влегува во клиниката на доктор Мајкл Тод Шуленберг, а со него се и неговиот телохранител и тапанарот Кирк Џонсон.
Пејачот изгледа, бледо, слабо и исцрпено, пренесува „Daily Mail“.
Снимката е објавена во четвртокот заедно со останатите снимки, документи и фотографии од истрагата, вклучувајќи ја и снимката која била направена во неговиот дом непосредно пред смртта, на која се гледа како полицајци трчаат кон местото на несреќата.
Матерјалот е објавен само неколку часа откако обвинителот Марк Мец соопшти дека нема да поднесува кривични пријави поради неговата смрт.
Најновите извештаи, објавени пред еден месец, покажуваат дека Принс во моментот на смртта имал смртоносна доза на фентанил во крвта, како и тоа дека причината за неговата смрт е предозирање.
Мец тоа го потврди, но и додаде дека истражувачите не можат да утврдат кој му го давал тој противзаконски лек на Принс.
„Едноставно немаме доволно докази за некого да обвиниме за злосторство“, вели тој после двегодишна истрага.
Функционери соопштуваат дека музичарот наводно не знаел дека таблетите содржат фентанил.
„Нема докази дека таблетите му биле препишани од доктор, ниту пак има докази дека некој имал намера или мотив да го убие“, вели Мец.
