Новинарот Џамал Кашоги беше убиен од саудиска специјална единица во конзулатот на Саудиска Арабија во Истанбул на 2 октомври годинава.
Според извор близок до истрагата, последните зборови на колумнистот на Washington Post биле: „Не можам да дишам“.
Изворот вели дека во грозоморната сцена Кашоги се борел со група луѓе кои биле решени да го убијат.
„Не можам да дишам“, рекол Кашоги.
„Не можам да дишам.“
„Не можам да дишам.“
Во транскриптот од снимките од конзулатот стои дека се слушаат звуци од сечење со пила додека го расчеречувале телото на Кашоги, а потоа на напаѓачите им се дава совет да пуштат гласна музика за да се пригушат звуците.
Според истиот извор, се слушаат неколку телефонски разговори. Турските служби сметаат дека тие телефонски разговори биле меѓу членовите на специјалната единица и високи владини службеници во Ријад, а содржината на разговорите била поврзана со тоа како напредува извршувањето на наредбата.
Овие нови сознанија најверојатно ќе извршат притисок врз администрацијата на американскиот претседател Доналд Трамп која е одлучена да го огради саудискиот принц Мохамед бин Салман од убиството на Кашоги.
Ставот на Трамп се коси со оној на ЦИА, од каде велат дека принцот лично го нарачал ликвидирањето на новинарот.
Новите сознанија исто така ќе го поткопаат официјалниот став на Саудиска Арабија која објасни дека смртта на Кашоги била резултат на своеволна акција на одметнати припадници на безбедносните сили што излегла од контрола.