Превирањата во американскиот банкарски систем и зголемените стравови од рецесија ја турнаа довербата на глобалните инвеститори на едно од најниските нивоа во последните 20 години, покажува истражувањето на инвестициската банка BofA.
Месечното истражување по колапсот на SVB и Signature Bank и пред минатонеделното спасување на Credit Suisse покажа дека перцепцијата за нивоата на ризик драстично се влошила.
Индикаторот за ризик на финансискиот пазар на BofA за нивоата на загриженост на инвеститорите скокна на 7,7, што го става малку под минатогодишното ниво по почетокот на руско-украинската војна и над нивоата во екот на глобалната финансиска криза и пандемијата. Менаџерите на европските фондови се особено песимисти.
Иако истражувањето е склучено пред проблемите во Credit Suisse, речиси една третина од нив сметаат дека сегашниот најголем ризик за пазарот е системската кредитна криза.
Во анкетата во февруари, уделот на оние кои очекуваа ваква криза изнесуваше само осум отсто, што значи дека евентуална кредитна криза првпат по девет месеци ја измести инфлацијата од првото место. Испитаниците го наведоа неформалниот банкарски сектор во САД како најверојатен извор на опасност.
Други студии дошле до слични заклучоци. Во Германија, месечното истражување на институтот за економски истражувања ZEW покажа нагло влошување на расположението на инвеститорите. „Меѓународните финансиски пазари се под силен притисок, а високото ниво на неизвесност се прелева на економските очекувања“, рече претседателот на ZEW, Ахим Вамбах.
Истражувањето на BofA покажа дека инвеститорите повторно се повеќе се плашат од рецесија и стагфлација. Нешто повеќе од половина од анкетираните менаџери на глобално ниво очекуваат послаб раст на светската економија. Иако 84 отсто од нив предвидуваат слабеење на инфлацијата, 88 отсто сметаат дека во следните 12 месеци најверојатното макроекономско сценарио е стагфлација, односно анемичен раст и висока инфлација.
Меѓу менаџерите на европските фондови, 61 отсто очекуваат рецесија во Европа во следната година, додека 55 отсто очекуваат таков исход во февруари. 42 отсто од менаџерите очекуваат глобална рецесија, речиси двојно повеќе отколку во февруари.
