Медиумите во Бразил, но и оние во Англија, со денови шират информации дека актуелниот тренер на Манчестер Сити, Жузеп Гуардиола, би можел да стане тренер на бразилската репрезентација.
По поразот од Спортинг во Лигата на шампионите, Каталонецот на шега изјави дека после тој резултатот сигурно повеќе не им е интересен на потенцијалните работодавци во Јужна Америка, а сега се огласи и претседателот на Фудбалската конфедерација на Бразил, Едналду Родригис.
Според него, Пеп е тренер кој секој би го посакал на клупата на неговиот тим или репрезентација, но тој категорично демантира дека имало какви било контакти.
„Пеп е меѓу најдобрите, ако не и најдобриот тренер во светот. Сепак, не сме имале контакт со него и не размислуваме да го ангажираме“, рече Родригис и додаде:
„Во моментов имаме селектор, а тоа е Доривал Жуниор , кој има валиден договор до 2025 година и имаме целосна доверба во него. Сега останува на него и на неговите соработници да се докажат и да останат на тие позиции во иднина“.
Селекцијата на петкратниот светски првак во моментов игра во многу променлива форма, на последните 9 натпревари забележа само 4 победи, а моментално ја зазема четвртата позиција на квалификациската табела за пласман на Мундијалот 2026.
