Организацијата за човечки права Amnesty International соопшти дека 3.000 здравствени работници починале од последици на COVID-19 низ светот, предупредувајќи на лошите услови за работа во кои работат, ниската плата, долгото работно време и насилството кое го трпат.
Во извештајот на организацијата е наведено дека во Русија починале најголем број од здравствените работници, вкупно 545. Малку помала е бројката во Велика Британија, вкупно 540. Потоа следат САД со 507 починати здравствени работници.
„Пандемијата со COVID-19 се влошува во целиот свет. Апелираме властите сериозно да ги сфатат сите здравствени и други есенцијални работници. Многу е вознемирувачки да видите како властите ги казнуваат работниците кои се незадоволни од условите за работа и на кои им е загрозен животот“, изјави Санита Амбаст од Amnesty International.
Во Бразил починаа 351 здравствен работник, а во Мексико и во други латиноамерикански земји 248.
На социјалните мрежи често може да се видат апели на доктори и медицински сестри кои укажуваат во какви услови работат. Властите се на удар на критики бидејќи не обезбедиле доволно заштитна опрема.