Европската комисија ќе ја слави годината на железницата возејќи низ шините на 26 европски држави за 36 дена, а ќе помине и кај нас.
Вкупно 20.000 километри ќе мине возот наречен Connecting Europe Express кој ќе патува низ Стариот континент оваа есен откако ЕУ ја прогласи 2021 година за година на железницата.
Почетната станица е португалската престолнина Лисабон и тоа на 2 септември, а крајната дестинација е Париз каде возот треба да пристигне на 7 октомври. Ќе мине низ 26 држави застанувајќи на 70 места, а сето тоа за 36 дена.
Connecting Europe Express ќе пристигне и во Скопје и тоа на 14 септември од Ниш, потоа ќе продолжи јужно до Солун, но по пат ќе застане во Гевгелија истиот ден.
„Патувајќи низ континентот, од Лисабон до Букурешт и од Берлин до Париз, Connecting Europe Express ќе оди по рутите кои нѐ поврзуваат сите нас - било како држави, бизниси или луѓе. Додека претставува симбол на поврзаноста, овој воз истовремено служи како потсетник дека пред нас е долг пат и многу работа да се заврши за железницата да стане превозно средство по избор за Европјаните“, вели Адина Валеан од ЕК.
Целосната рута со сите попатни станици низ детален преглед:
Иако целта на возот е да ја покаже обединетоста на Европа, сепак не сите земји ќе бидат посетени. Така, возот ќе ги прескокне Црна Гора, Албанија, Косово, Босна и Херцеговина, Лихтенштајн, Сан Марино, Монако, Финска, Норвешка, Ирска, Обединетото Кралство, како и оние од истокот Белорусија, Украина, Русија и Молдавија, потоа Турција, Грузија, Ерменија и Азербејџан, и нормално островските Кипар, Малта и Исланд.