Од почетокот на месецот цената на нафтата на светскиот пазар бележи постојан пад. Некои од причините се стравувањата поврзани со Кина, но и преговорите за можното ограничување на цената на руската нафта од страна на Европската Унија.
На почетокот на овој месец, на четврти ноември, цената на нафтата од Северното Море – Брент беше 98,57 долари за барел. Во моментов, оваа нафта за декемвриските договори се тргува за 84,60 долари за барел. Во понеделникот цената на нафтата беше само неколку центи над 80 долари за барел.
Сличен пад на цената беше забележан и кај американскиот нафтен индекс WTI. На почетокот на месецот барел од оваа нафта се продаваше за 92,61 долари, а во вторник на 29 ноември се тргуваше за 78,38 долари за барел.
Пад на цената е забележан и кај останатите нафтени индекси. Така, на врвот на цената овој месец, нафтената кошничка на ОПЕК изнесуваше 97,32 долари за барел, а во петокот оваа нафта се тргуваше за 83,8 долари за барел.