Австрија, Чешка, Словачка и Унгарија планираат усогласено заедничко отворање на границите кон средината на јуни, соопшти денеска шефот на австриската дипломатија, Александер Шаленберг.
– Се согласивме да го минеме тој пат заедно и со себе да ја земеме и Унгарија, рече тој на видео конференцијата со колегите од Чешка и Словачка, Томас Петричек и Иван Корчок.
Одлуката за отворање на границите би можела да биде донесена уште следната недела, а потоа ќе биде одреден конкретен датум, вели Шаленберг во изјава за агенцијата АПА.
Тој рече дека во моментов интензивно се работи на тоа од средината на јуни да се воспостави целосна слобода на патување со Чешка, Словачка и Унгарија, како што беше и пред пандемијата на новиот коронавирус. Истовремено, тој потенцира дека е важно мерките да бидат донесени врз основа на јасни параметри за здравјето, мобилноста и безбедноста.
Шаленберг најави дека во наредните денови ќе се одржи друга видео конференција, во која ќе учествува и унгарскиот колега Питер Сијарто.
Меркел и В4: Границите треба да се отворат што поскоро, но внимателно
Канцеларката на Германија, Ангела Меркел и лидерите на Вишеградската група се согласија дека е заеднички интерес постепено да се укинат ограничувањата во контрола на границите, кога тоа ќе биде можно, согласно условите кои ги диктира пандемијата на новиот коронавирус.
Вишеградската група или В4 ја сочинуваат државите Полска, Словенија, Унгарија и Чешка.
По видео конференцијата на лидерите на В4, Меркел и чешкиот премиер Адреј Бабиш на билатерална средба потврдија дека сакаат да ги олеснат мерките за граѓаните и компаниите во пограничниот регион, онолку колку што дозволува нивото на новозаразени, изјави портпаролот на германската влада Штефен Зајберт.