Нема договорено нова средба помеѓу премиерот Зоран Заев и неговиот грчки колега Алексис Ципрас, изјави владиниот портпарол Миле Бошњаковски и ги отфрли шпекулациите дека во процесот на преговори околу името се разговарало за отстранување на членовите 3 и 49 во Уставот, кои се однесуваат на државните граници и македонските малцинства во други земји. Тој не откри ниту која географска одреница е прифатлива за македонската влада.
„Знаете дека детали околу преговорите во оваа фаза не откриваме. Преговорите се процес од сериозно значење, се работи за проблем што е многу долг и што води кон решение, кое ќе биде резултат на заемен компромис, достоинствено решение кое ќе го заштити дигнитетот на граѓаните од двете земји. Како Влада нема да си дозволиме да навлегуваме во шпекулации по однос на тоа што е објавувано во медиумите и не би имал што да додадам надвор од изјавата на премиерот“, изјави Бошњаковски на денешната прес-конференција.
Вчера премиерот Заев изјави дека Македонија е подготвена да прифати име со географска одредница, но не откри повеќе детали со цел, како што рече, да не се наштети на преговарачкиот процес околу овие чувствителни прашања.
На вчерашната седница беа донесени одлуките за преименување на автопатот во „Пријателство“ , а го објавија и новото име на аеродромот „Александар Велики“, кој сега ќе го носи името Меѓународен аеродром „Скопје“.