Македонската машка одбојкарска репрезентација се падна во група со кодомаќинот Финска и со уште два ривала со кои играше и на претходниот континентален собир.
На денешната жрепка во финската престолнина Хелсинки репрезентацијата на Македонија беше извлечена во групата Ц каде покрај кодомаќинот Финска се најдоа уште и Русија, Холандија, Турција и Шпанија.
„Против Турција на јануарските квалификации остваривме биланс 1-1 и успеавме да се пласираме, со Финците пред две години загубивме на почетокот на еврошампионатот, така што нашите одбојкари сакаа и добија шанса за реванш, а против Русија не можевме да покажеме многу во 'Стожице' затоа што 'Зборнаја' секогаш, па и сега ќе биде меѓу главните фаворити за трофеите. Холандија ја совладавме во квалификациите во 2009 во Скопје, а од Шпанија имаме два пораза во 1995 во нашето прво учество во квалификациите за континенталните самити. Европското првенство ќе трае од 1-19 септември, но најпрво црвено-жолтите ќе се обидат да дојдат до златниот медал по три неуспешни финалиња во Европската лига“, велат од Одбојкарската федерација на Македонија.
Одбојкарското ЕУРО 2021 ќе се одржи од 1 до 19 септември во 4 земји: Естонија, Полска, Финска и Чешка.
На минатото ЕУРО, кое за нас беше дебитантско учество, исто така бевме во група со Русија, Турција и Финска и загубивме од трите.