Четврти пораз за македонската одбојкарска репрезентација откако попладнево со 3:1 падна пред Шпанија.
На Македонија не ѝ оди на второто Европско првенство. Откако загубивме од Финска, Холандија и Турција, сега пораз запишавме и против Шпанија против која со право се очекуваше позитивен резултат.
Првиот сет беше многу неизвесен, се играше поен за поен со малку отстапки во водство, а Македонците водеа 18:17 кога Шпанците направија пресврт и со 25:23 поведоа со 1:0.
Слично беше и во вториот сет, овој пат Шпанија водеше сѐ до 10:9 кога нашите направија пресврт, водство кое го задржаа до крајот и израмнија на 1:1 победувајќи со 25:21.
Третот сет веројатно беше и највозбудлив бидејќи се играше на продолжение, а нажалост на крајот го доби Шпанија со 30:28.
Во четвртиот сет концентрацијата веќе попушти, па Шпанците го добија убедливо со 25:15 за нивна прва победа на овој континентален собир.
Македонија е веќе отпишана и ќе се пакува за враќање дома веднаш по задутрешниот последен натпревар против Русија кој се игра од 16 часот.
Останатите натпревари од 5. коло во нашата група се играат денес и утре.
Табела:
- Турција 9 (9:2)
- Холандија 7 (8:3)
- Финска 6 (7:4)
- Русија 5 (7:6)
- Шпанија 3 (4:10)
- Македонија 0 (2:12)
