Очекувано, во најдобрите единаесет доминираат играчите на Вардар кои покажаа најмногу и се лидери на табелата.
Во заедничкиот избор на порталите MacedonianFootball.com и Transfermarkt.de употребена е формацијата 4-2-3-1 и има шест играчи од Вардар и тоа целосната одбрана на чело со голманот Филип Гачевски кој на дури 11 од 18-те натпревари не прими гол.
На десната и левата бековска позиција се Владица Брдаровски и Бразилецот Леовижилду, додека централни дефанзивци се Јевхениј Новак и Кристијан Тошевски. Одбраната на Вардар во есенскиот дел на 18 натпревари прими 11 голови, што е најмалку од сите клубови. Бразилецот дури и беше одличен во офанзивниот дел постигнувајќи 4 голови и запишувајќи 6 асистенции. Воедно, сите петмина полусезоната ја завршија без нити еден црвен картон.
Во централниот дел од средината се Ѓорги Стоилов од Академија Пандев и Арменд Алими од Шкендија. Стоилов беше најдобар поединец во струмичкиот тим и се избори и за деби во националниот тим. Алими, пак, беше ретка светла точка во бледиот тим на актуелниот шампион Шкендија кој беше големо разочарување изминатава есен и оттаму доби само еден играч во иделниот тим.
На крилните позиции се Бразилец и Хрват. Сержињу беше незапирилив за притивниците играјќи по левата страна за тимот на Шкупи. Постигна 4 голови и асистираше трипати, но секогаш кога на тимот не му одеше тој беше моторот кој ја преземаше обврската да ја креира играта. На спротивната страна е Никола Прелчец, играч кој лесно се адаптира на различни позиции во нападот. Тој е најзаслужен што Борец уште на полусезона не е испаднат бидејќи со осумте голови му донесе еден куп бодови.
Како треквартиста е Даниел Аврамовски, веројатно најдобриот играч на есенскиот дел. Се препороди во Вардар каде со 9 голови и 6 асистенции скоро секогаш беше одлучувачки фактор кога вардарци собираа бодови.
Во нападот најистурен е босанскиот голгетер Марин Јурина како втор играч на Шкупи кој доби место во идеалниот тим. Одигра 16 натпревари, постигна 8 голови и еднаш асистираше. Јурина беше навистина тежок играч за чување во казнениот простор со кого противничките одбрани мака мачеа.
Покрај идеалниот тим составен од 11 играчи, одбрани се и 12 резервни играчи.
Голмани: Костадин Захов (Шкендија) и Душан Чубраковиќ (Академија Пандев)
Лев бек: Гледи Мици (Шкендија)
Централни бекови: Егзон Бејтулаи (Шкендија) и Марио Маслаќ (Академија Пандев)
Десен бек: Мевлан Мурати (Шкендија)
Дефанзивна средина: Филип Најдовски (Вардар) и Филип Дурански (Силекс)
Треквартиста: Боби Божиновски (Македонија ЃП)
Крила: Љупчо Дориев (Академија Пандев) и Стениу Жуниор (Шкендија)
Напад: Ремзифаик Селмани (Ренова)
