Одделението на Државниот пазарен инспекторат во Куманово ќе биде затворено бидејќи еден од инспекторите е позитивен на COVID-19, соопшти денеска директорот на Државниот пазарен инспекторат, Стојко Пауновски.
– Денес веќе во Куманово ќе мораме да го затвориме целокупното одделение бидејќи еден од инспекторите се покажал позитивен на COVID-19. Сè што беше од наша страна, правиме за да ги заштитиме инспекторите, но и оние кои правилно ги почитуваат мерките, уредбите и протоколите од Владата бидејќи тоа е во интерес на сите, рече Пауновски.
Апелираше до сите граѓани, особено до претседателите на политичките партии и верските заедници, да бидат одговорни.
– Мораме неселективно да постапуваме за да бидеме успешни. Потребна ни е помош од сите граѓани и од правните субјекти за да на крај излеземе како победници и да не бидеме единствениот во регионот каде секојдневно има зголемување на случаи позитивни на COVID-19, рече Пауновски.
Пауновски беше прашан во која скопска општина има најмногу пријави за прекршување на протоколите и во која скопска општина се вршат најмногу контроли, при што директорот одговори дека во општина Чаир има најмногу кривични пријави.
