Денеска во Шпанија се игра последното коло од Ла Лига во кое ќе го добиеме името на шампионот за сезоната 2020/21.
Во трката за титулата останаа само мадридските клубови Атлетико, кој ја брка својата 11-та титула, и Реал, кој ја брка својата 35-та титула шампион на Шпанија. Атлетико е актуелен лидер со 83 бода, 2 повеќе од градскиот ривал.
Тимот на Диего Симеоне патува на гости кај Ваљадолид, додека Реал на Зинедин Зидан го пречекува Виљареал. Пресметката е јасна - Атлетико станува шампион со победа, додека во случај на преостанатите два исхода би зависело од Реал.
Доколку Атлетико киксира, без разлика дали ќе загуби или одигра нерешено, Реал со победа би станал шампион, бидејќи дури и во случај на ист број бодови „Кралевите“ би имале предност поради подобриот меѓусебен скор (2:0 и 1:1).
Освен борбата за шампион, ќе биде возбудлива и борбата за местата кои водат во Лига Европа, како и во борбата за опстанок.
Реал Сосиедад (59 бода) и Бетис (58) се наоѓаат на местата што водат во Лига Европа, додека Виљареал (58) е на местото кое води во новата Европа конференциската лига. Со оглед на тоа што „Жолтата подморница“ игра против Реал, се очекува сите три клуба да останат на тие позиции на крајот од сезоната.
Уеска (33), Елче (33) и Ваљадолид (31) се во борба за опстанок, а само еден тим ќе биде спасен. Ваљадолид не само што има најмалку бодови, туку игра против Атлетико и ќе му биде потребно вистинско чудо да не ја мине следната сезона во Сегунда.
Доколку Уеска и Елче ја завршат сезоната со ист број бодови, Уеска ќе остане во лигата поради подобриот меѓусебен дуел.
Седум натпревари од поседното коло се играат денес од 18 часот, а се среќаваат:
Ваљадолид - Атлетико
Реал Мадрид - Виљареал
Осасуна - Реал Сосиедад
Селта - Бетис
Уеска - Валенсија
Елче - Атлетик
Еибар - Барселона.
Завесата на оваа сезона ќе биде спуштена утре со натпреварите Гранада - Хетафе (18:30) и Севиља - Алавес (20:00). Синоќа својот натпревар го одиграа Леванте и Кадис (2:2).