Македонската компанија за анимација и визуелни ефекти ФХ3Х учествуваше во креирањето на визуелните ефекти на деветнаесеттиот член на Марвеловиот универзум - „Одмаздници: Војна на бесконечноста“.
На 26 април во киното Cinplexx ќе биде премиерата на најисчекуваното продолжение на „Одмаздници“ од Марвеловиот универзум, „Одмаздници: Војна на бесконечноста“, на чии визуелни ефекти работеше и македонската компанија за анимација и визуелни ефекти ФХ3Х.
Филмот е во режија на Ентони и Џои Русо, и ги обединува суперхероите од Одмаздниците, Чуварите на Галаксијата во најспектакуларната актерска екипа досега со Роберт Дауни Џуниор, Крис Хемсворт, Марк Рафало, Крис Еванс, Скарлет Јохансон, Бенедикт Камбербач, Том Холанд, Чедвик Босмен, Пол Бетани, Елизабет Олсен, Антони Меки, Себастијан Стан, Том Хидлстон, Зое Салдана, Вин Дизел, Бредли Купер, Крис Прат, Гвинет Полтроу, Ангела Басет и многу многу други. Прашањето кое ги интересира сите фанови не е кој ќе учествува, туку кој ќе продолжи понатаму?
„Одмаздници: Војна на бесконечноста“ е Марвеловото продолжение на „Одмаздници“ од 2012 година, и „Одмаздници: Ерата на Ултрон“ од 2015 година и е деветнаесетти филм во Марвеловиот филмски универзум.
Според Кристијан Даниловски, косопственик на ФХ3Х и извршен продуцент, на овој проект се работело од октомври 2017 до февруари 2018 година.
„На овој проект беа изработени околу 50 кадри, а според Фанданго страната за продажба, филмот е веќе рекордер во продажба на онлајн билети како најпопуларен филм. Овој рекорд го постигнал во првите 6 часа од отворањето на продажбата. Причина за интересот е што многу фанови сакаат да ги видат огромниот број суперхерои како соработуваат заедно, групирањето со Чуварите на Галаксијата им е симпатично и ова го доживуваат како кулминациска точка во кинематографијата на Марвел, чија разврска ќе се случи во продолжението закажано за 3 мај, 2019 година“, изјави Даниловски.
