Кривичниот суд не определи притвор за Драган Павловиќ Латас, Ејуп Алими и Исмет Гури, како обвинети во предметите на СЈО.
Во предметот познат како „Тифани“, судот го уважи предлогот на СЈО и определи мерки за претпазливост за новинарката Ивона Талеска со тоа што таа секој работен понеделеник во месецот ќе треба да се јавува кај надлежно службено лице, и привремено одземање на патна исправа и забрана за издавање на нова патна или друга исправа за преминување на државната граница.
Предлогот на СЈО поврзан со предметот „Тотал“ за определување мерка притвор против новинарот Драган Павловиќ Латас заради постоење на основано сомнение дека сторил кривично дело Даночно затајување се одбил како неоснован. И тој ќе има обврска секој работен понеделеник во месецот да се јавува кај надлежно службено лице во Основниот суд Скопје 1 – Скопје, а судот определи и привремено одземање на патна исправа и забрана за издавање на нова патна или друга исправа за преминување на државната граница.
Предлогот на СЈО поврзан со предметот „Титаник“ за определување мерка притвор против Ејуп Алими заради основано сомнение дека сторил кривично дело – Уништување на изборен материјали и за Исмет Гури заради основано сомнение дека сториле кривично дело – Уништување на изборен материјал се одбива како неоснован.
Мерки на претпазливост добија сите обвинети во случајот „Тортура“.Во однос на предлозите од СЈО кои веќе се распоредени и се во работа пред Кривичните совети од одделението за Организиран криминал и корпуција, по писмена изработка на одлуките и нивно доставување до странките, јавноста ќе биде дополнително информирана.