Нов член на „најбрзиот циркус“ од 2026 година ќе биде познатиот американски Cadillac, соопшти Формула 1 организацијата.
Светската автомобилска федерација (ФИА) и Ф1 дадоа конечно одобрение за тимот на Кадилак да им се приклучи на Ферари, Мекларен, Ред Бул и други, а тимот, поддржан од TWG Motorsports и General Motors, ќе влезе во натпреварувањето во 2026 година.
ФИА и управата на натпреварувањето објавија дека новиот тим ги исполнил сите услови за да се приклучи на Формула 1 и да стане 11-та екипа во шампионатот.
Во оваа прилика изјава даде извршниот директор на натпреварувањето, Стефано Доменикали.
„Како што рековме во ноември, посветеноста на General Motors да го донесе Кадилак во Формула 1 беше важна и позитивна демонстрација на нивната желба да го унапредат нашиот спорт. Би сакал да им се заблагодарам на General Motors и TWG Motosports за нивниот конструктивен ангажман во преговорите во текот на изминатите месеци и со нетрпение очекувам да му посакам добредојде на тимот на почетокот на сезоната во 2026 година“.
Претходно беше најавено дека новиот тим во Формула 1 ќе користи мотори на Ферари во својата дебитантска сезона.
Инаку, базата на тимот на Кадилак е во британскиот Силверстоун.
