Аргентинецот Маурисио Почетино (51) и официјално го презеде тимот на Челси, објави во понеделникот лондонскиот клуб. Почетино потпиша двегодишен договор со Челси кој ќе стапи на сила на 1 јули 2023 година.
На менаџерската функција Почетино ќе го наследи Френк Лампард, кој во текот на сезоната како привремено решение го презеде тимот од Грем Потер. Претходно Потер, во септември минатата година го замени Томас Тухел.
Лампард, не успеа да го раздвижи тимот и сезоната ја заврши на разочарувачката 12. позиција во Премиер лигата.
Почетино се враќа во добро позната средина, во Премиер лигата и во Лондон, иако во друг клуб. Аргентинецот го имаше најдолгото тренерско искуство во Тотенхем (2014-2019). Со Тотенхем не успеа да освои ниту еден трофеј, најголемиот успех му е пласман во финалето во Лигата на шампионите.
По заминувањето од Тотенхем, тој раководеше со Пари Сен-Жермен една сезона (2021/2022).
Оттогаш беше без работа.
