Преброени се 100% од гласовите во скопските општини Гази Баба, Кисела Вода и Чаир. Во првите две општини градоначалници уште по првиот круг доби ВМРО-ДПМНЕ, додека во Чаир ќе има втор круг.
Убедлив победник во Гази Баба е Бобан Стефковски од ВМРО-ДПМНЕ кој освои 60% од гласовите, односно 17.910, пред Борис Георгиевски од СДСМ со 29,49% (8.804 гласови). Катерина Јовановска Ивановска од ТМРО освои 574 гласови (или 1,92%), а Ѓорги Тодоров од Интегра 544 гласови (1,82%).
Нов градоначалник на Кисела Вода е Орце Ѓорѓиевски од ВМРО-ДПМНЕ кој со 14.691 глас (односно 52,50%) убедливо победи во однос на останатите кандидати. Втор е Филип Темелковски од СДСМ со 7.691 глас (27,48%), трета Јулијана Штрковска-Колариќ од Левица со 2.794 гласови (9,98%), потоа Ѓулистана Марковска од ЛДП/ДОМ со 1.481 глас (5,29%) и на крај Росанда Марковска од ТМРО со 127 гласови (0,45%).
Во Чаир ќе се оди на втор круг откако кандидатот на ДУИ, Висар Ганиу, за малку не го стигна прагот од 50%+1. Тој освои 13.020 гласови, или 48,87%. Него противкандидат ќе му биде Беким Сали од Алијанса и Алтернатива кој освои 9.849 гласови (или 36,97%). Трет заврши Кастриот Реџепи од Беса со 1.071 глас (4,02%), Елдан Џигал од БДС доби 590 гласа (или 2,21%), а Мисин Градунај од ДПА доби само 253 гласа или помалку од 1% (0,95%).
При крај е пребројувањето во Карпош каде Душко Весковски од СДСМ е сигурен патник во вториот круг, а фото-финиш ќе одлучи дали ќе му се придружи Стевчо Јакимовски од ГРОМ кој има блага предност пред Оливер Зафировски од ВМРО-ДПМНЕ.
Со овие два градоначалника сега ситуацијата според партии е следна:
- СДСМ - 9 градоначалници
- ВМРО-ДПМНЕ - 20 градоначалници
- ДУИ - 3 градоначалници
- ДПТМ - 1 градоначалник
Во Ѓорче Петров има уште околу 11% од гласовите да се пребројат, а таму Александар Стојкоски од ВМРО-ДПМНЕ има шанса да победи и во првиот круг бидејќи моментално има 49,85% од гласовите.
Во Аеродром остануваат уште околу 10% од гласвите да се пребројат, а во водство е Тимчо Муцунски од ВМРО-ДПМНЕ со 55,35% и има голема шанса да триумфира уште во првиот круг пред Александар Филиповски од СДСМ и Весна Кираџиева од Левица.