На денешната прес-конференција на Државното јавно обвинителство на Бугарија беше истакнато дека бројот на жртвите во изгорениот автобус е 44 не 45 или 46 како што претходно се тврдеше.
Бугарското обвинителство даде отчет за истрага при што нагласи дека истражителите на местото на несреќата издвоиле 44 трупа. Седуммина преживеани се сместени во болницата „Пирогов“, а при разговор со човекот кој го скршил прозорецот од автобусот и овозможил тие да се спасат, рекол дека од автобусот излегле 8 луѓе.
Списокот на патници во автобусот вели дека имало 50 патници и двајца шофери, односно вкупно 52. Но, бројот на жртви е 44, а преживеани 7, значи вкупно 51 - што според Бугарското обвинителство значи дека еден веројатно претходно се префрлил во друг автобус.
Бугарските обвинители сметаат дека изјавата дека 8 лица излегле од автобусот е неточна.
„Ние пронајдовме 44 трупа, а тој категорично изјави дека се спасени 8 лица. Јас му реков 'вие сте 7 во болницава'. И тој категорично ми рече 'не, ние се спасивме осуммина'. Во текот на истрагата, беа пронајдени 44 трупа. Според податоците со кои располагаме, патувале 52 лица, ние пронајдовме 44 тела, а се хоспитализирани 7 лица – четворица мажи и три жени. Останува големата загатка, каде е осмото лице. Работиме на таа верзија, не сакаме да шириме дезинформации, може да се работи и за лошо сеќавање на сведокот“, истакна портпаролката на главниот обвинител на Бугарија, Сијка Милева.