Скопје, 13 ноември 2019 (МИА) – Министерството за одбрана денеска објави јавен оглас за прием на нови 125 професионални војници на служба во Армијата на Република Северна Македонија.
Рокот за пријавување е 15 дена од објавувањето на огласот.
Кои се условите за пријавување?
Кандидатите за прием на професионални војници на служба во Армијата на Република Северна Македонија треба да ги исполнуваат следните услови:
Општи услови:
- да се државјани на Република Северна Македонија;
- да се полнолетни и
- да имаат посебна здравствена и физичка способност.
Посебни услови:
- да имаат завршено средно образование;
- да имаат завршено доброволно служење на воениот рок и
- да не се постари од 25 години на денот на завршувањето на огласот за прием на професионални војници.
Во огласот исто така се наведува дека работното време е од 8 до 16 часот, а платата изнесува од 22.059 до 25.574 денари.
Подетални информации за јавниот оглас може да се најдат на веб страната на Министерството www.mod.gov.mk.
-Ги повикуваме сите млади и мотивирани граѓани на нашата татковина, кои ги исполнуваат условите наведени во јавниот оглас, да се пријават и да станат дел од Армијата на Република Северна Македонија, која наскоро ќе биде и Армија на НАТО. Војничката професија нуди исклучителни можности за напредување, за личен развој и за напредување во кариерата, велат од Министерството за одбрана.