Новак Ѓоковиќ пред неколку месеци купи луксузна вила во Марбеља, шпанско одморалиште во близина на Малага, но многу брзо се најде на мета на крадци кои провалиле и ограбиле одредени скапоцености.
Според српските медиуми, грабежот се случил на 23 август, а од куќата биле земени пари, накит и скапи часовници. Во тој дел од популарното одморалиште беа ограбени 22 куќи, а една од нив е онаа на Ѓоковиќ, која ја користи најмладиот брат на Новак, Ѓорѓе.
Импресивното здание српскиот тенисер го чинеше 10 милиони евра и се простира на 1.000 m² од вкупно 3.500 m² колку што е површината на целиот имот. Пред да го купи Новак се изнајмуваше по цена од 10.000 евра неделно.
Во надворешниот дел на имотот има голема градина со базен со поглед кон морето и планините. Пред куќата има скара, простор за забава, па дури и тениско игралиште каде Ѓоковиќ може да тренира и вежба кога е на одмор во Марбеља или кога ќе одлучи да помине неколку дена таму со своите најблиски.
Внатрешноста на куќата е украсена со многу интересни модерни орнаменти, а има огромна дневна соба со неколку софи и фотелји, камини, соби со балкони со поглед на Медитеранот и неколку луксузни бањи.
Собите и трпезариите се поврзани со сводови, а подовите и мебелот се мешавина од антички и модерен дизајн.
Инаку, Ѓоковиќ се пласираше во четвртфиналето на УС Опен откако го победи Американецот Џенсон Бруксби со 3:1 во сетови (1-6, 6-3, 6-2, 6-2). Најдобриот тенисер на светот ќе игра во четвртфиналето со Италијанецот Матео Беретини, кој го победи Оскар Оте со 3:1 (6-4, 3-6, 6-3, 6-2).
