Истражувачите тврдат дека ги откриле легендарните сали на Аменти во „огромен град“ под египетските пирамиди во Гиза - теорија која ги збуни археолозите, но експертите ја отфрлаат како „лажни вести“.
Италијанските и шкотските научници кои ја проучуваат Хефреновата пирамида тврдат дека нивната „револуционерна студија ги редефинирала границите на сателитската анализа на податоци и археолошките истражувања“, рече портпаролката Николе Чиколо.
Како дел од проектот Хефрен, експедицијата ја предводеа Корадо Маланга од Универзитетот во Пиза и Филипо Бјонди од Универзитетот „Стратклајд“ во Шкотска, со цел да се истражува втората по големина пирамида на висорамнината Гиза.
Користејќи ја технологијата на синтетички радар со апертура (SAR), научниците лоцираа 5 мали простории во пирамидата. Една од нив содржела саркофаг кој, според истражувачите, бил погрешно сметан за гробница на фараон.
Тимот тврди дека ги пронашол овие пет претходно непознати структури во центарот на пирамидата.
Новооткриените структури се поврзани со премини кои водат под површината и се вели дека откриваат скриени простории и бунари под структурата стара 4.500 години.
Електромагнетните сигнали беа претворени во фононски податоци, кои открија поголема инфраструктура која се протега на илјадници метри под земја. Осум големи, вертикални структури - за кои се претпоставува дека се бунари или шахти - се протегаат повеќе од 2.000 метри во широки и 600 метри во длабочина.
Истражувачите не ја откриле целта на овие поголеми структури, но планираат дополнителна анализа и можно ископување за да ја потврдат „вештачката природа“ на овие формации.
Проектот користел два сателита на надморска височина од околу 675 километри за да ги „фотографира“ пирамидите со радар, објави Daily Mail.
Податоците биле обработени во слики кои создале груба претстава за она што се верува дека е под пирамидите, вклучувајќи 8 бунари.
Внатрешноста на овие структури се состои од спирални премини кои водат уште подлабоко под земја. Тимот ги искористил податоците за да создаде груб 3D модел на она што се верува дека е скриено од очите на јавноста.
„Кога во иднина ќе ги зголемиме сликите, ќе откриеме дека под сето ова е она што може да се опише само како вистински подземен град“, рече Маланга.
Но, скептиците брзо се посомневаа во кредибилитетот на студијата, посочувајќи дека проектот не ги објавил податоците во ниту едно рецензирано научно списание.
Д-р Захи Хауас, познат археолог и поранешен египетски министер за антиквитети, веднаш ги отфрли тврдењата, нарекувајќи ги „целосно неточни“ и „лажни вести“.
„Тврдењето за користење радар внатре во пирамидата не е точно, а техниките што се користат не се ниту научно одобрени ниту потврдени“, изјави тој за National.
Истражувач од Универзитетот во Денвер ги нарече тврдењата „претерани“, истакнувајќи дека технологијата сè уште не е доволно напредна за да создаде такви слики.
Експертот за радари, Лоренс Кониерс, верува дека е можно петте помали комори пронајдени под површината навистина да постојат, но поради историјата на областа.
Според Daily Mail, Кониерс забележал дека оваа земја била света за древните цивилизации уште пред изградбата на пирамидите. Иако тврдењата на научниците наидоа на критики, тие повторно го разгореа интересот за можноста за откривање на древни текстови и други ресурси од египетските митови.
„Постои неверојатно силна врска помеѓу распоредот и карактеристиките на овие подземни простории и легендарните сали на Аменти, како што е опишано во древнките митови“, рече Чиколо.
Салите на Аменти ја вклучуваат митската Сала на записи - скриена просторија која, според легендата, се наоѓа под пирамидалниот комплекс или Големата Сфинга и содржи информации за древните народи од областа.
„Овие нови археолошки откритија би можеле да го редефинираат нашето разбирање за светата топографија на древниот Египет, обезбедувајќи просторни координати за претходно непознати и неистражени подземни структури“, додаде Чиколо.
