По примена кривична пријава, Основното јавно обвинителство Скопје поведе постапка против едно лице за сторени кривични дека – Фалсификување исправа од член 378 и – Изработување и набавување оружја и средства наменети за извршување кривично дело од член 395 од Кривичниот законик.
Осомничениот откако набавил предмети, соодветна опрема, за кои знаел дека се наменети за извршување кривично дело, со умисла извршил повеќе временски поврзани дејствија што претставуваат повеќекратно остварување на исто дело – фалсификување исправа.
Во периодот од 2012 до 2017 година осомничениот изработувал разни јавни исправи со невистинита содржина, и тоа лични карти, возачки дозволи, свидетелства за завршено средно образование, судски решенија, пресуди, договори за купопродажба на моторно возило, медицинска документација и слично. Исправите ги изработувал на лажни обрасци, како да се издадени и заверени со печат и потпис од државни и јавни институции од државата.
„Целта била фалсификуваните јавни исправи натаму да се користат од страна на наши државјани и странци како вистинити во правниот промет во Република Македонија и во странство“, соопшти ОЈО Скопје.
Надлежен јавен обвинител донесе наредба за спроведување истражна постапка и до Основниот суд Скопје 1 Скопје достави предлог за определување на мерката притвор за осомничениот.
