Тренингот во Сена за пливање на отворени води е откажан денеска бидејќи водата била несоодветна за пливање, објавија организаторите на Олимписките игри во Париз.
Ова е петти откажан тренинг од почетокот на Олимписките игри, откако првите четири беа за триатлон, поради што триатлонот кај мажите беше одложен за еден ден.
Одложено е и запознавањето на патеката за пливање.
„По дневниот ситуационен состанок утринава помеѓу Ville de Paris, Paris 2024 и World Aquatics, одлучено е воведот закажан за денес, 6 август 2024 година, да се одложи“, се вели во соопштението на World Aquatics.
Не беше наведена причина за одложувањето, но се вели дека повеќе информации ќе бидат достапни подоцна во вторник. Состанокот на лидерите на тимовите и брифингот на тренерите ќе продолжат според планираното. За да можат спортистите да пливаат во реката, организаторите внимателно следат две нивоа на фекална бактерија: E. Coli и ентерококус.
Француските власти потрошија 1,4 милијарди евра за надградба на канализациониот систем во главниот град, ветувајќи дека реката ќе биде доволно чиста за жителите да пливаат до следното лето. Во четврток и петок се закажани пливачки маратонски трки за жени и мажи.
Неодамна се појави информација дека белгиската атлетичарка Клер Мишел завршила во болница. Таа е заразена со бактерија E. coli, која предизвикува проблеми со желудникот и цревата. Причина за болеста може да биде и загадената Сена. На истите проблеми се пожалија уште неколку спортисти во Париз. Меѓу нив е и швајцарскиот триатлонец Адриен Брифорд, кој пливаше во реката.
Норвешкиот триатлонец Ветле Бергсвик Торн се разболел 24 часа по пливањето во реката Сена: „Го мислиме она што го мислат сите, дека тоа е поради пливањето во реката, но не знаеме. Можеби е од реката, можеби е од пилешкото. Лекарот остава можност да се работи за труење со храна“.
