Олимпискиот дух ја победи политиката: Селфи за историја на Северна и Јужна Кореја

Вчера, на церемонијата на доделување на медалите во пинг-понг, видовме сцена која го обиколи светот и даде надеж за подобра иднина кога се во прашање односите меѓу Јужна и Северна Кореја.

Јужна и Северна Кореја се во војна, која технички трае веќе 74 години, со оглед на тоа што во 1953 година само беше потпишано примирје, но никогаш и мировен договор, а односите меѓу владите на двете земји се многу напнати.

Згора на тоа, неодамна нивните односи се влошија до тој степен што организаторите на Олимписките игри во Париз стравуваа од средбата на спортистите од двете земји. Но, она што се случи на доделувањето на медалите во мешани двојки го воодушеви целиот свет.

Северна Кореја го освои второто место зад Кина, додека натпреварувачите од Јужна Кореја освоија бронза.

Најпрво бронзените медали ги добија Шин Ју-бин и Лим Џонг-хун, а пред да ги добијат сребрените медали натпреварувачите од Северна Кореја направија голем гест.

Ри Јонг Сик и Ким Кум Јонг се симнаа од подиумот и лично им честитаа на своите соседи за медалите, што го воодушеви спортскиот свет.

По церемонијата, Јужнокорејецот Лим направи историско селфи со своите соседи од Северна Кореја, покажувајќи уште еднаш дека „обичните“ луѓе не ги следат слепо политичарите и дека се уште има шанси за помирување и подобра иднина на Корејскиот Полуостров.

Сите се надеваат дека никој од натпреварувачите нема да има непријатности во својата земја поради овој гест, а тоа особено се однесува на Ри и Ким од Северна Кореја.