Одложените Олимписки игри во Токио ќе се одржат во 2021 година без разлика дали уште ќе трае пандемијата со коронавирусот, потврди потпретседателот на Меѓународниот олимписки комитет Џон Коутс.
Тој рече дека ОИ ќе почнат на 23 јули следната година и ги нарече „Игрите што го победија коронавирусот“. Овој значаен спортски настан требаше да почне во јули годинава, но беше одложен поради пандемијата.
Комитетот и претходно кажа дека не планира да ги одложува ОИ подолго од 2021 година.
Потпретседателот Кутс додаде и дека спортскиот спектакл во Токио ќе претставува „светло на крајот на тунелот“ во однос на смртоносната пандемија.
Во јули годинава беше соопштено дека можно е ОИ да се одржат пред ограничена публика. Свеченостите за отворање и затворање на Игрите ќе бидат поеднооставени, а ќе биде намален и бројот на персонал и членови во делегациите на секоја од земјите.
Во Токио требаше да стигнат повеќе од 11.000 спортисти од 200 земји ширум светот.
Како ќе се одвива патувањето и учеството на спортистите догодина уште не е познато, а засега границите на Јапонија главно се затворени за странски посетители.
