Олмо е пред преселба во Барселона, од трансферот милиони ќе заработи и Динамо

Барселона испратила официјална понуда за една од најголемите ѕвезди на неодамна завршеното Европско првенство, Дани Олмо (26), тврди Mundo Deportivo.

На одличниот напаѓач му е понуден 6-годишен договор, а Барселона за неговите услуги би му платила на Лајпциг 60 милиони евра.

Оваа понуда, како што тврдат од Mundo Deportivo, најверојатно ќе биде прифатена, а сега останува да се види каков ќе биде одговорот на самиот играч.

Во целата зделка одлично ќе заработи и загрепски Динамо. Имено, Динамо со продажбата на Олмо на Лајпциг заработи 29 милиони евра, а во договорот стави и клаузула според која има право и на 20% од добивката што германскиот клуб ќе ја добие од продажбата на Олмо. Бидејќи се споменува сума од 60 милиони евра, јасно е дека ако Германците за толку го продадат Каталонецот, нивната добивка во однос на тоа што му платиле на Динамо е 31 милион евра. Од таа сума, 20% или 6,2 милиони евра би отишле за Динамо.

Доколку Олмо ја прифати понудата и заврши во Барселона, тоа ќе биде враќање на Шпанецот во редовите на каталонскиот тим по 10 години.

Во претходните четири и пол години во Лајпциг одигра 148 натпревари, постигна 29 гола и забележа 34 асистенции.

Претходно за Динамо забележа 124 настапи со 34 гола и 28 асистенции.

Кариерата ја почна во младинските категории на Еспањол, па се пресели во оние на Барселона, но не стигна до првиот тим оти на 16-годишна возраст дојде во Динамо.